Chob Béte Canteraine
(Léginde du Vimeu)
Dins l'viu temps, i n'avouot des seigneurs tout partout. I n'avouot des riches à mort, bien intindu et pis dz interdeux...
I né n'avouot un qu'oz appelouot CAMP D'AVÈNNE. Il étouot connu comme él loup blanc, pis riche comme Crésus. Oz a tojours dit qu'il avouot trouos chint soéssante - chon villages à li tout seu. Autant qui n'a d'jours dins un an ! L'pire, ch'est qu'il étouot batailleux comme un tchien, pis maouais comme un leu. D'abord, i passouot tout sin temps à tracheu chipouille à tout l'monne.
Pèr bonheur, un bieu jour, tous chés seigneurs, grands comme piots, vius comme jonnes, il on décidé d'leus in alleu, tortous insanne, au diaboli, foaire la djerre à chés Turcs. Il ont parti d'Adville. Ch'étouot CAMP D'AVÈNNE et pis Godefroè d'BOUILLON qui cmandoèt' échl armèe.
CAMP D'AVÈNNE il a tè vingt ans parti ! Vingt ans à s 'batte pour un oui pour un non, contré n'importé tchèche! Vingt ans à foaire les chint dix-neu coups !
Portant, il a fini pèr érvénir, aveuc l'idèe dins s'tête éd continueu tous ses batailles. Étouot pus fort éq li ! Il étouot comme dominé du Malin !
Justémint, in rintrant à sin poéyis, il a seu qu'un eute seigneur il avouot profité qu'i n'étouot poé lo pour li dégonneu sin catieu.
Quant' il a vu o, il a ieu eune colére noére. I n'in moussouot comme un tchien aragè. I n'sé connaissouot pus. I s'a mis à courir tout drouot dvant li, comme quéqu'un qui n'a point tous ses sins. Il a arrivé au pieud d'l'abbaye d'Centule (Saint-Ritcher). I y a mis l' fu et pis il a pillè toute et pis brulè toute à l'intour. Pus loin, il a tué un paure viu tchurè dins sn'église, pasqu' il avouot dit d'li dins s'tchielle préchoére.
Sin pus grand camarade, Robert, i y avouot dit, un coup, qu'i n'avouot point raison d'foaire tous ses vérlèes. Quoè qu'il a répondu CAMP D'AVÈNNE ? Érien ! Il a tué sin camarade comme eune mouque !
A foait qu'il étouot brouillè aveu tous ses gins, aveu tous ses pus vius amis. Ses domestiques, quant' il lé voéyoèt' arriveu, i trannoèt' comme des feuilles !
Oz intindouot pérleu d'li à pus d' dix liues tout à l'intour. I n'arrétouot poé d'tueu, d'voleu, pis d'bruleu, n'importé d'où.
Pèr nuit, chés paures gins, i n'osoèt' meume pus fremeu leus deux zius à-foait, peur éq CAMP D'AVÈNNE i viènche sans qu'il l'intènch't. Chés vius gins i disoèt' comme o qu'o n'avouot jamoais ieu si peur édpis Garamond pi Isambart, du temps qu'o s'muchouot din chés souterrains, aveuc tous chés bêtes, chés vaques, chés vieux, chés gvaux, chés bérbis, in attindant qu'chés Neurmands i fuch'té passés.
- Il est maouais comme un leu, ch'nom d'un tonnerre-lo, qu'o disouot tout partout.
- Quant'èche qu'o sra débarrachè d'ès pieu ? Quant'èche qu'o porra vive un molé trintchille, in travaillant, sans tranneu ?
Chés énèes i passoèt' comme o, l'eune apreu l'eute. Mais va-ti point qu'un bieu jour, oz a intindu brouir éq CAMP D'AVENNE il avouot ieu eune telle colére, qu'i s'avouot mis à hurleu comme eune bête seuvage, si fort qui n'n'avouot tcheut àr-rinverse, roéde mort. Ch'qui n'a d'pus fort, ch'est qu'étouot vrai!
- CAMP D'AVÈNNE il est mort ! CAMP D'AVENNE il est mort ! In moins dé rien, comme eune figèe, o l'l'a seu tout partout.
Chés gins i n'n'étoèt' comme étombis. I n'povoèt' mie l'croére, chés paures gins ! Pèr nuit, i n'ont poé tè capabes éd fremeu leuz zius eune démi minute ! Su l'coup d'minuit dins tous chés mèrres dins chés rios, dins chés riviéres, tous chés raines i leus ont mis à canteu tortous insanne, tant qu'il ont peu. I bzoèt' un vaquérmé du diabe, à échouir des sourds, à rinvilleu des morts.
Pis, sans qu'o s'attènche à rien, comme o, sans savoér pourquoè, pus rien Mais rien du tout ! Point davantage éq dins eune église apreu les vrépes ! A duré chon minutes, comme o, pétète dix…
Tout d'un coup, oz a intindu des hurlèes comme du harnu, à foaire tranneu chés creusèes, et pis un potin d'ferailles et pis d'tchaingnes comme si tous chés vaques éd pèr ichi il éroèt' ébzinè tortous insanne, in trinant leus tchaingnes et pis leus pius. Heureusemint qu'éch vaquémé d'infér i n'a poé durè longtemps ! Mais l'lin-nmain, ch'est coère tè l'meume canchon. Su l'coup d'minuit, chés raines il ont rquéminchè, pis l'reste. Él sul-lin-nmain roére él meume note !
Oz a fini pèr savoér él fin mot d'éch qui s'passouot. CAMP D'AVÈNNE il étouot mort et pis bien mort, mais o n'a jamoais rtrouvè sin corps pasqué, austot mort, il a tè cangè in leu, aveuc des pattes, édz eureilles, un musieu, pis eune tcheue ! ...
Ch'est dpi ch'temps -lo qu'i reude pèr nuit, in criant comme un leu et pis in trinant des monts d'tchaingnes attatchèes à sin dos, à s'tcheue, à sin co et pis à ses pattes.
Comme i cmènche tojours pèr foaire canteu chés raines, i n'a longtemps qu'o n'l'appelle pus CAMP D'AVÈNNE. O dit CANTERAINE .
I n'a si longtemps d'échl histoére -lo qui né nlo qui dit'té comme o qu' chob bête CANTERAINE a n'passe pus jamoais. I n'a dz'eutes qui dit'té qu'av-vient coère à msure mais qu'o n'l'intind point, pasqué s'vouo al est cassée...
Portant, grand-père Cassifar i no racontouot tojours qu'il avouot vu pis intindu chob bête, pus d'vingt coups, in rvénant d'abatte édz abes dins chés bos.
- D'abord, qui disouot comme o ch' bocagneu, o n'aveu qu'à vnir aveu mi, eune nuit qui fra un noér éd teupe. J'vos marai à l'Infer (1), à ch'bos d'Huqueleux o bièn du cotè d'éch Tchéne à leu (2), su l'coup d'minuit...
Mais, i feut dire qui n'a jamais ieu un qui s'a richtchè à alleu aveu li…