In·ne
légende ? In·ne hisotére vræ !
Chés leus·wérous
d'éch bo d'l'Infer
Thierry - Nibeu
A NIBEU, apreu ch'Bout d'Rimbén,
quant oz alleu du côté d'éch TCHUNÉRON (liu-dit),
o poveu vir, au pieu d'chés roéyons, un rond, un grand rond
à d'où qué chl'hérbe al est bién pu vérde
qué ch'réstant dé ch'plant. Ch'est leu, ch'est "ch'rond
d'chés fées".
Um molé pu avant din ch'bo dusqu'à chés
fonds d'Wailly, leu, coér un piot bout tout du long d'l'AVALASSE (rio
qui passe pér leu), et pi oz étes àch bo d'l'INFER.
Aveuc un om comme eu, a n'est mie étonnant qu'i
yeuche yeu des LEUS-WÉROUS àcht'indrouot d'leu !
O n-n'a ti dit dsu leu dos, paures bétes... putot
paures gins pététe !
Mitan d'éch darin siéc y'avouot, à
Nibeu, un viu cabartieu coér réstè jonne-homme, aveuc
un breu affolè, pi tous les jours au vrépe i s'in-allouot d'és
cassine, ésn'ébsache à sin co, sin halo férrè
à main droéte, pi i s'in-allouot pér éch bout
d'RIMBÈN. Étouot rédeux, sin manége...
Des piots nazus il l'ont sui à mzure, seulmint,
passé ch'Courdjin, i s'déhalouot à chaque coup sans
qu'o l'voéche. Qua-meume, Chouo-ch'mérichau- i disouot ll'avoér
milé un coup qui rvénouot in bégneu d'éch mértcheu
d'Pindè, muchè din un buchon au côté dé
chl'Abret pi l-l'avoér vu foaire un saquoè imbzibe : PASSEU
DES HAILLES ÉD RONCHES SANS S'DÉGRITTEU NI DÉFLÉPEU
S'CASAQUE !!!
Bié-seur, o n-n'a jamoais seu d'plu. Portant, i sé n-n'a coér
passè, pi des rédeuses. Un coup, comme eu, un cinsieu d'éch
Bout d'Beu d'FREUCHÉN'VILLE, i rvénouot d'Arrest mneu sin blè
à muison : Passè ch'bo d'l'Infér, in r'montant choc-cavèe
d'Wailly, un LEU, aveuc eune panche comme un béri-au-beurre, i déboque
din sin bégneu ! No paure homme i n-n'a réstè béc-et-borne.
Il avouot un meu du diabe à t'nir sin bidet tout épaveudè,
tout in insséyant d'cacheu ch'bétail à coups d'cachoére,
mais à chaque coup i fzouot eune ébondie du diabe à
s'joutcheu quasimint au couplet d'chés abes.
Leu, cht'homme il a vu qu'ch'étouot un leu-sorchieu,
i s'a don rapurè pi il l'a tchittè bonsseu din sin bégneu.
Comme d'éffet, arrivè à chés hailles du Botchet,
chu leu i s'a mis à bzineu du cotè dé ch'bo d'l'Infér.
Acouteu don cmint qu'tout eu a s'a fini : Un coup qu'Monssieu l'Tchuré
il avouot tè à WAILLY mneu l'Bon-Diu àl téonne
d'éch cabartieu, il avouot du y résteu dusqu'au vrépe
rapport à ch'méchant temps. Il don tchittè au soér,
éch méni éd Wailly comme chol-leune a s'écanillouot.
Ch'étouot dustémint eune monction ch'coup-leu.
In s'satchant
dé ch'bo d'Raimbèn, i rbèe du cotè dé
ch'Rond des fées, pi i pinse à-pért-li : "Ch'est
qua-meume point chol-leune qu'al donne comme eu !". Arrivé pu
preu, i s'muche din chés haillures, au pieu d'eune hétrésse
pour mileu à sn'aise. à
chinquante peus d'li, i voét, alintour d'un grand fu... sans bo ...
tous chés feux-fus, chés latuzès pi chés bricassis
dé ch'poéyi, au côtè d'un leu-wérou ;
tertou, dvant LUCIFER atampis.
« Est à nn'éte saisi, des bleuses-vues comme eu
! ch'diabe aveuc tout sin train ! »
Quante toute a tè fini, i n'réstouot pu
qué ch'leu-wérou, qui s'a cangè, in un coin d'ziu, ...in
cabartieu.
É9ch lin-nmain, Monssieu l'Tchuré il a
don tè vir noz homme à s'moéson. Ch' cabartieu i ya
dit comme eu : « à foait sécantes énèes
qu'a dure, tous les Sin-mdis, quante chol-leune a s'écanille. Éch
Diabe il est pu fort éq mi, feut qu'j'y voéche ».
L'Abbé i n'y-a dit qu'adè. Seulmint, l'sémaine
d'apreu, comme éch leu-wérou il arrivouot àch Rond des
Fées in darin, Monssieu l'Tchurè i s'a déssatchè
d'sin buchon aveuc eune saille d'ieu bénite. Comme un diabe din s'boéte,
ch'grand fu il a détein tout seu pi i n'a pu réstè qué
ch'cabartieu, fin contint, qu'oz a vu l'lin-nmain à l'mésse
aveuc és téonne, és boéne téonne, qu'al
avouot, pér hasérd, tcheu malade eune jornèe dvant.
T.
SELLIER
NIBEU
Rimbèn = Quértieu din Nibeu, Puchage
Imbzibe = impossible, infoaisabe
monction = canjmint d'leune
sécants = quelques